FORUM

Tartisma Forumu
 
AnasayfaAnasayfa  PortalliPortalli  SSSSSS  AramaArama  Kayıt OlKayıt Ol  Üye ListesiÜye Listesi  Kullanıcı GruplarıKullanıcı Grupları  Giriş yap  

Paylaş | 
 

 Wuşênê Dewa Borê Bınêni Tertelê 38i sero Qeseykeno

Önceki başlık Sonraki başlık Aşağa gitmek 
YazarMesaj
Torné Thuji



Mesaj Sayısı : 215
Yaş : 69
Kayıt tarihi : 06/02/08

MesajKonu: Wuşênê Dewa Borê Bınêni Tertelê 38i sero Qeseykeno   C.tesi Ekim 30, 2010 10:24 pm

Wuşênê Dewa Borê Bınêni Tertelê 38i sero Qeseykeno



-*- Mı ra vane, Wuşênê Borê Bınêni.

-Ez nıka şeşt u phonc seri derune( Sıro ke qêy kerdo)



Ez aşıra Demenu ra, pêra Kırtu rau ne. Werezayê Sılê Suri ne. Mua mıke mı de nêwese vi ya, xalê mı Sılo Sur yeno kıstene. Ma Demenu çhor pêrime, Sımailu, Kırtu, Mıstıku, Mamedu.


-- Ez hirıs u hêşt (otuzsekiz) de ses-howt serde vi ne.


>Ma Boro Bıne de heşt çey vi me. Boro Sere de hiresey çê ret bi. Esker ke amê ma ser, Demenu şime kotime derê Laçi.


>Dere ceri ra ‘ve cor pırr vi. Her keş gorê ho sanay ‘ve cı, jüye dewe male ho dımera vi me.


-*- Dıma Avasu, Khalu, sare İksori ki amey vi derê Laçi. Cüamerd sodır şiyene tufong estene, vera-sura amenê çê.


Gêgane esker biyene berz amenê dormê deri. >O waxt pêro kotene ’ra zımu, velg bırnene ardene qelevnene de goru. Çıke kêşi mal besenêkerdenê teverkero.


>Deva-dêve asme hal nia şi. Esker kotenê dere, sefkanu esker tene dere ra fiştene düri, yi oncia amenê.

İvisê Sey Khali ke gına cı, pêrüne tıfongi teğelna. İvis hetê Pêtere ser Pirxatune de gına cı.



<>Esker top ardi vi pulê Pirxatune ser, uza ra nane ’ve mara. İvis kas ra vêjino ro ser, sono verê topi ke top bıjêro, esker vineno, cori ra nanê pa, çımde gınena cı bıne gulede vejina.



Dıma esker top ard boverê ma, serê Koê Sosın, ver çarnare lone.

A roze top nayve lonera, vera-sura tope kote lone, tede des-u-hire mordemi amey kıstene. Lone de ke çine vi, hiresey mordemi bi. Wertê merdu de apê mı Qemere Hesen ki bi. O waxt pilê Demenu Cıvrail Ağa, Hesenê Gêwere ju ki apê mı Qemerê Hesen vi. Lona ke ma tey vime, Hesenê Gêwere ki tey vi. Sefkanon ra teyna o xeleşia. Esker koti ve dormê lone. Hesenê Gewera, çêverê lone de kot vi peê khêmere, boyna nêne ve eskeri ra, nêverdene lone kuye.
<>

Hesenê Gêwere dı-hire rey lone ra vejia, esker tenê peyser pısqıt, eve khêl puxıri ra çeverê lone ra kot zerre, venga apê mı Qemeri da va, “Qemer, mevınde fisegê mı qediye”. Apê mı Qemeri teneke fisegi kerd ve çüalo şia, berd çêverde, peê khêmere de lewe de nayve ro. Hesenê Gêwere reyna galme ‘ve eskeri kerd, tene lone ra bira hira, oncia peyser ame, zerre lone de jivatiya. Jivatiya ma, hard u asmen lone kena. Endi lêlo qolind kot vi. Hesenê Gêwere ke oncia ame, apê mı Qemeri ra vake:

-Qemer narae xeleşia ma çina. Esker zof zor keno. Sekon nêkon dormê lone ra dür nêkunê, mezal ’ve ma nêdano. Mevınde, lonera teverve.

Hesenê Gêwere haqivê ho fişt ‘ra hermê ho, çêna ho nêro hermê hoser, tufongê ho kerd ‘ve ho dest, o ver, ma dıme ra bime tever.

Pesewa kotime ‘ra pêdıme some. Pesewa, kês thoae nêvineno.Şime aşe bimeb ma Hesenê Gêwere kerd vind. Da-dese cüamerdi amey rest vê pê, lay kerd pêser, ağiri cini u domoni aşêra nay ro ardi raste, hore şime hete çhemi. Piye mı ma de niyo. Ma jumini kerd vind. Ez leê mua huyo leê apê ho Qemeri de rune.


Eke vengê çhemi ame, ma domonu vake, ma têsanime. Qav, tua made çino. Mua mı vake ita vındere. Nivo esker dormê çhem de vo. Ez son eve fosa sarê ho uwe an. Şiye, mara awsena, eke vuroşiya çhemi biye, esker çhem sero ağır makina nê ro. Mua mı nêame. Ma, ez ’ve dı bıraune hora vıra ra amıka mıde mendime. Desta sodiri ma hove lona ka cıra vejiayme, eve aye guret oncia cêrayme dere laçi. Çıke ma zovina rae nêvete. Ameyme verê lone, lone berza, besenêkeme cıkume. Mara, ezune, apê mı Qemero, lazê deyo, wae de mına. <


Bıra sodır, esker ma dime. Corde ver kerd ra cı, kemeru gındırkene.


Ma ho rınd kerd ’ve bıne aşira ke kemer ma megıne. Laze apê mı, dı-hire serde vi, berveno, hard u asme nano jümini ra, vano, ez têsanune. Apê mı henke cıra bêzar bi, verva khemeru erzeno ke, khemer puro gıne, va bımıro. Niada ke nêveno, apê mı veng da vake bê, mıja ho lopa mıde bıke, ez neydine, sola vengê ho bıvırno. Mı zor davê ho, tene çılike ame destê apê mı, kerde fekê lazeki. Lazek desınde tü kerde, vake, „na uwe ğıravına“.


Mend, eke şiye dina gurete, esker khêmeri vındarnay, ma ho nave ro hetê çhem ser şime.

Çhem sero Hesenê Gêwere ame leê ma. Ame ke dırvetinê, bêçiki cıra çine. Kote werte eskeri. Esker bomba esta, bêçik cıra biye, çêna ho ki esta, tey niya.

Apê mı ra vake,

-Qemer ma kume na lone. Na lazê mı ’ve ciniya mı ki sıma de bêre, sıma ki şêre na lona ke boverê ma ra ae kuye. Honde ke ro mı de vi, ez esker sıma ser nian. Ez ke merdune o waxt esker hona sıma cêno“.

Taxıme çeki day ’ve ma, apê mı ’ve jü mordemeke bini ra, cıra vatene Alê Cemi, ma guretime, şime koti me lona ke Hesenê Gêwere vake, kotime aye.


Jü ape mı ’ve Alê Cemi ra cüamerdiye, aye bine ke lone de rê, pêro cınon u domeniye, pêro pia da-dese mordemime. Lonake Hesenê Gêwere kote cı, wertê aşeyre vi ye. Eke çineviye des-u-ponc-vişt metre berze vi ye.

Taê rewıt kerd pêser hen kot cı. En senık şeşt mordemi Hesenê Gêwere de şi koti lone. Hona şiye dina nêgureta, esker kotive verê lona ke Hesenê Gêwere teyro verê aye. Rewıt hona çêver verdere, mara awsena. Dı-hire Kırmanc eskerde vi. Veng da vake, „bêre teslim vê, esker sımara thoae nêvano“. Kês nêama tever. Tene ke mend esker dı-hire bombey eşt ‘ve lone, hama ara cı nêkot, çıke çeverê lone yan vi.


Lêl kot, sewe ke tene şiye, Alê Cemi apê mıra vake, “Qemer bê ma na lone ra tevervime şime. Eke bi soder esker na lonu pêrune ceno“. Lona ka me tede ri me, serê a lonede heve qulva biye, Alê Cemi a qulva ro vejia ser, ma pêro qulva ra ontime, berdime peê lone.

Cinıya Hesenê Gêwere made nêame. Lazê ho guret lonede mende. Vake, „ez mêrde ho ca-nêverdan. O ke sevi, ez ki tey hên bon”. Apê mı taxıme çeki lewe de caverday, terkıtime şime. Cinıya Hemê Welê Khali vatene, “a cınıke tene ardê genimi kerde kosê çita ho,gırede, ver sanine ra.

Ma pêro vêsanime. Hot-heşt rojio kêş thoae nêwerdo. Her ju tene ardi kerd deste ma, ma zu fişt ta.

Uştime ra kotime era rae some, some hetê Gafati. Pesewa. Alê Cemi lazo hermi sere o, ma vero, maki dımaray me. Some hama çutır some, payname rê meyitu heni some.

Her ca cendegê. Şime, kaso Luk vane, kotime uza. Tariyo, thoae nêwsono. Qe mı vira nisono, yekte jü çıka, vake, „wuy anne“. Yoğro ke Alê Cemi payno ro eskeri, eskero çıkeno. Ma nêzona ke sevi, kıle ma sero kerde we.

Esker nat-doti ra kerd ra ma ser. Ma ho aşero gındıre ceri kerd. Alê Cemi uza lazê ho hermê ho sera est.Ma ke tene ca şime, lazek ma dıma vezü dab vakeb „Alê ma, ça mı caverdana, Alê ma, ça mı caverdane“.

Dı-hire rey ke hen veng da, Alê Cemi apê mıra vake, „Qemer, laze mı werte eskerde mendo, ez oncia peyser son lazê ho con, qe mı bıkıse. Ez lazê ho ca-nê-verdan. Hora ke heni cı nêgınıyo, dest finra cı cen an.“

- Ma ra bıria ra şi, laze ho guret ard. Ma oncia reştime pê, hore Pêtere guret şime. Ezune, waa mına, lazê apê mıno, apê mıno, Alê Cemi ’ve lazê huyo ciniye ra, çhor teney çê Hemê Welê Khali vi. Hona taê domone bin ki bi.

Tenena ca ke şime ma, waa mı, ez ju ki dı çeneke de bin, i ki serrune mıde vi, qelfe kerd vind. Ma çoremena domoni peyde mendime, ho sana</span><span> ’ve bınê khêmeri, rae tever nikeme. Tene ke vêrd ra ciniya Alê Cemi vejiye ame, pers kerd, vake, “apê to yi kotiye”. Mı vake, „nêzonon, ma jumini kerd vind“. Mıra vake, “na çeney ita vınde, bê ez ‘ve tora piya şime, apê to yine bivinime, uncia peyser yeme na çênu cême some.“Kotera mı ver, a ver ez dıma xêle rae şime, çhem de vejiayme. Endi biyo ra sodır.

Aee ho uza kerd vind ez teyna mendune. Mı tene uwe çarne ra feke ho, niada ke dara suredare bırna, hona nevde az do. Şune vejine re suredare ser, mı az ho sero ard pêser, tij estve gıle kou. Mı niada ke apê mı cori ra fekê çhemi ro yeno.

Mı azê suredare lewna, apê mı ez düne.

Vake, „nero çeney kuye“.

Mı va, “hal mezal nia, ciniya Alê Cemi çêney peyde caverday. Çeney ke peyde mendi jüye çena a cınıke viye, yane çêna Alê Cemi, jüye waa mı vi ye, jüye ki çêna Hemê Welê Khali vi ye.” Apê mı taê khalık-bavıkê cınıke vat, ez guretune şime. Ma reyna çenu ra xevere nêgurete, merdi, mendi, esker tey berdi nêzonon. Şime Gafat. Şime ke Hemê Welê Khali ki uza ro, pêro pia new mordemi; ez, apê mı, lazê ho, Alê Cemi ve laz u cınıya hora, Hemê Welê Khali ’ve laz u ciniya hora, ameyme pêser. Ma va gêste qırr bime.

Hemê Welê Khali va, "thoae leê mıde çino, jü tene rono khano, solino, nêwerino.“

Hama a boveri ra kemer de zu bıza de Kırmanciye menda, lenga coka ro esker tey nêberda. Eke bese bıkeri ae biyarine sımare sernine, sıma xeleşine, zovina sıma gestera qırr bene.
<

Şi, xêle caro, hama mara awseno, kemeri ra bıze xêle fetelne, ağıri pê gurete arde. Arde sarebırne, tawuke goni verde gurete kerde werte adıri teneke kelğas biye, hen bêsole ma nê-ze-layme-de-cı werde. Goni ma guretime, Hemê Welê Khali ra qeyır, pero pia bolmıs bime. Hemê Welê Khali, bıze veta, xağ kerda, girena, mara hona kesi ra ho nêamê. Narae ki ey uwe gureta jü ve jü verdanora ma ser ma anora ho.


Amey me ra ho ke biyo sewe lete. Her jü heve gost da ‘ve ma, Vake, jedê mewe re, gıneno sıma. Mend sodır, ap mı Hemê Welê Khali ra va, “ala reê son diarê derê Laçi, Hesenê Gêwere yi seviye, gurete, yaki hone esker dormedero.”



Hemê Welê Khali şi, vejiya ame vake, „gurete berde. Dere isizo, Demenune ke mende hae ame meyitu dane we.“Ma ki uştime ra şime dere Laçi. Şime ke iye ke xeleşiye ame, piyê mı ki teyro, hetera merdunê ho kene sae, hetera ki niadana ala kame ho xeleşiyo.



Deva-deve çewres mordem ameyme pêser.

Qesey kerd, vake,

-Hesenê Gêwere ke pê cêne, pêro qelfi jümini ra gıredane fine ‘ra rae. Werte de Khalu ki estê. Rayver Seyid Ağay vatene, pilê Khalu vi, o rae ra kuno. Esker uza sarê dey cıra keno. Hesenê Gêwere niadano ke bıne gule ‘ra sarê bırnene, Rayver can erzeno, cereno ‘ra eskeri ra vano, o mal niyo, qulo, quli bınê gulera nê, peê vıli ra sare birino. Esker sare cıra keno, tey cene. Qelfe bene Oziz Avdel, bene leê alaiye. Rae ra Hesenê Gêwere, ciniya hora vano, eke besekena lazek bıje, ho yande. Nıka ke şime leê alaiye, verva çımune mı tore şiasat kenê, mıre çetu yeno. A dıjdia ho erzena wertê bırri. Niajniya mına ke pi teslimê eskeri kerda, ae gesey kerd, vaka qelfe ma Oziz Avdel de vi. Qelfê Hesenê Gêwere ki ard. Eke ard, qelfe bene Oziz Avdel, morene ke cınıya Hesenê Gêwere tey çına. Hesenê Gêwere, narae ostor wertê alaiye ra fetelna. Dı-hire rey cıra pers kerd, va, Hesenê Gêwere to na hondê esker sekerdene. Hesenê Gêwere, vake, sekerd, qırr kerd. Hesenê Gêwere qelfera bırnene ra bene, ave xağu cıra kene tij vera vındarnene, dımera kı sarekene.”



Vêsaniye, kêşi de thoae çine. Murtê Aslan vatene, apê Memed Aydın vi, ey ke koti dardivi we nêzonon, ree-dı-rey şi ard vet ardi, ciniye potene ey ki lokme ve lokme kerdene ma dest. Qe pers meke, Laç de kokê Demenu ’ve Khalu ard. Eve hazaru ra mordem kişiye. Dı hire roji ra dıme, ma iye ke peyde mendime, jümini ra bırayme ra şime, her jü hore cae koti ‘ve lone. Çıke esker hona eve wesu feteliyene.



Esker çığaş ke Laçi ra vejiay vi, hona dormê Oziz Avdel de vi. Eke biyene sonde, cüamerd Lone ra vejiyene şiyene dormê dewu, eke fersa diyene kotene zerre dewu hore mıleti ra non wastene, ardene ma Lone de werdene. Esker ke corde cêra de, amê şi, koti ke hekin bi fiştene ‘ra cı. Cae hekin nêmend.



Ma şiyene, sarê hekıno ke vêso, kerdene are ardene, ya ridene ra, kerdene qawute werdene, ya ki jê bıjêruku werdene. Pede pede hete dewe ser şime. Düri ra niada ke bon pêro vêsnê. Analığa mı, mısayiva piyê mı, hore qırt (sarê hekıno ke vêso) kerdo are, dı-hire milişi kote ver, cıra gureto. Ame, piyê mıra vake, piyê mı, jü mordeme ko de bin, jü ki analığa mı, uşti ra şi ke qırt peyser bıjêrê.



Giniye de benê esker serra, esker nano ninera, piyê mı uza mıreno. Ez teyna leê apê ho Qemeri de mendune.



Yê apê mı ki hora hire laji ’ve ciniye ra xeleşiay vi.



Xevera merdena piyê mı ke ame, apê mı ho sas kerd, seveta piyê mı bi bom. Vınetene, yekte zırçene, vatene, “Sılema, Sılema ho bısevekne, qersun amey gınay to.



”Ağıre dıme ra tene bi rınd, xêyle Ko ‘ve Ko fetelay me, peyniye de apê mı damis nêvi, teseliya ho kote, ez ‘ve hire domone u ciniya hora guret, şime leê Xıdê Memê Keki, vake, “apo ez endi damis nêvon, domanu cên son teslim ben.



”Xıdê Memê Keki vake, “Qemer, domenu bere leê qereqolê Sıluzu de caverde, race bê.” Ape mı vake, “mıke domon caverday, racerena mı çıka. Ez çıtur damıs bon”. Xıdê Memê Keki vake, “eke heniyo, serva mı vake, bırarzaê ho ita leê ma de caverde, domanunê ho bıjê su teslım ve.



Ape mı ez caverdune, domanunê ho guret şi teslim bi, o ‘ve domnuni ra surgıne Çorumi kerd. Ez ki şune leê apê huye bini. Ciniya na apê mı Pilvanki ra çêna Memê Seydi vi ye. Şi vi çê piye ho, pi berdi vi teslime hukmati kerdi vi. A ki surgunê Sarımbeg kerdi vi. Apê mı Qemer ki sono surgın, keno sae niajnia mı, vineno, ceno leê ho.Apê mı ez guretune berdune leê lazê apê ho.





İye dey ki hire domonê ho vi, cini çine vi. Esker ke tene oncia amey me dewa ho Boro Bıne, kotime page. O waxt milişi bi, şiyene feteliyene, eke caê adır, dü thoaê diyenê,xevere dêne eskeri ardenê.



Yoğro ke milişi ma dime, esker ardo kerdo dormê ma, xevera ma çına.



Peniye de gınayme puro, ma dere ro tik remay me, şime esket, esketê Khêmerê Sur vanê. Kamı ji dewreş ke vêng dêne Haqi, vatene qılavuzê Xızıri na esketi de ro. Ma ke remayme, hermetê peydê mende. Ae zonene ke, ma somê esketê Khêmerê Suri.



Esker pê ae gureto, vişta ’ra ho ver, anê ma ser. Ma hot-heşt mordemi me, ez leê apê ho de rune. Ma ke kotime esket, cer u cor niada ke esker rezeno. Ma pêro, ri ser, esket de meredayme ra. Apê mı cüamerdu ra vake, tufongunê ho pırkere, lıngê de vınderê. Hora ke esker çeverde koti zerre, sola ma hora ave dı-hire tenu bıkışime, yi hora ma qırkene.



Esker corde ame esket ser nat-dot niade ma nêdime, esket sero nişti ro, lıngê ho ki esketi ro verday ro. Cero ki eskero bini amê, amê çeverê esketi, ey ki ma nêdime. Qılawuzê Xızıri perda onta çımunê eskeri ver, ma xeleşiayme.





Esker peyser onciyene, ma ki dıma niadame. Esker şi kot fekê derê Giniye, dewızê ma Memed Aydın ’ve eskeri ra juminde vejine. Memed rameno, esker verdano cı, hata ha haza, bese-nêkerd pê bıcere, dest ğeleşia. Wertê eskeri ra milisê veng da vake, „ero to ’ke kama, to nade moa ma şiya ğeleşiya.



“Memed cüav da vake, "heya hora heniyo, mı nade moa sıma xeleşüne.“Davançe de Memedi bi, davanço de qolvi. Memed davançê huyo qol ont, dı-hire rey peqna, terkit ama leê ma.Ma bırr ve bırr feteliyene, dewu ra non kerdene are.



Eve na hal ameyme peê Ğuloği. Uza vake, şime bovera destê Kuresu ra non biarime. Deva-deve çewres mordemi koti era rae şi. Mi ho nave ro, dızdia yine dımera amune fekê çhemi. Waxto ke yine kınce ho vet ke uwe kuye, amune leê dine.



Apê mı herediya verda ’ve mı dıme, vake, “ez ney erzon uwe. No ça leê domanude nêvınıto, ma dıma amo.”Mılet vajia pıra vake, amo amo, thoae nêveno, tey beme dota ya tey ame, yaki leê Rayveru de caverdame. Yê tu ki dı domaniye. To ancağ qayıte dineve. Kotime uwe vişayme bovver, şime Pirku. Mare no nave ru, ma none ho werd. Narae ki non, qatığ çı ard, kerd ve çüalu, teli gıreday, endi some. Ape mı jüye Heyderij ra vake, seveta mı, na lazek bere Taxtê Xel de teslime çe rayvere ma Bava Qeraman ke.



Ez berdune diareTaytê Xel, mıra vake çe Bava Qereman hao. Ez teyna şüne çe bavayi. O waxt esker çê kamde ke sarê Demenu dozkerdenê, o çê vêsnenê, sarê çei ki surgın kerdenê. Na rira çê Bavay ki tersene. Ez hire asm ağure de dardune we. Ez qe tever niviyene.



Dima Rayverê ma çê Sılemane Qersuni amey ez berdune çê ho. Vake, laze tolıvê mao. Ma non sola jümini werda. Narae ki cıranon ğérve çe rayvere ma nikerd. Vatene gêre keme. Esker bêro ney bıkıso, sıma ki surgın kero.Nae sero çê Rayverê ma rısvet da ’ve muxtari ez berdunê Mazgerdi de ho sero qeyd kerdune, nıfısa mı vete, ez hot serde saneno cı.





Nae dımera kéş veng nivet. Ez tam des ser çê Rayverê ma Sılemanê Qersun de mendune. Des seri ra têpia ef vejia, apê mı Qemer ğerv ra peyser yeno, xevere ceno ko ez çê Rayveri derune. Taê mılet kerd top, ama çê Rayver, vake, „bırarzaê mı mıde. İne vake nie o laze mao, ma ho ser qeyd kerdo, ez cı nêdanu. Uşti ra şi, werte ra dı-hire asmi vêrd ra, apê mı Qemer ve hire mordem u ra oncia vejiay amey. Apê mı vake, mı bırarzaê hore çêneke wasta, nisa no ro. Bırarzaê mı bıde, bon zeweznon.

“Çe Rayveri vake, „nê, ma ki besekeme lazek zewezneme"



Ciran ki koti werte, vake. „Rayver lazê sariyo. Haq rajivo, çığaşke to ho sero geyd kerdo, seê mordemek cıde.



Xêle camat u mıslet dıma ez düne apê mı. Ma şime Pilvank, çıke hukmat hona nêverdene ma şime dewe. Ez Pilvak de zewejine. Vıstewrê mı, mıre qesey kerd, Sılızo. Vake, esker verfine, şime Laçi, kotime dere ke jü cınıke kışıya, laze ho, deva-deve dı ser de vi, jüyo de kezik, lewe de ro. Ho rê qum de kay keno... Tenê ke kay keno, sono meyıte moa ho ser tene cızık lino, oncia kay keno. Reyna lino, cerona ra qum kay keno.



Ma vınetime tey niadame. Yüzbaşı vake, qarse cı meve, o hove ho mıreno. Tene seker da ’ve esker, vake bere lewê de rone. Qese hona fekte vi, onbaşı xıl bi, sungi werte bêrkunê lazek de kerd pede. Seke sungi koti ’ve wertê bêrkunê lazeki, çızıya lezeki hard u asmen lone kerd. Onbaşi sungi fişt hawa, lazek ki gılra o, hen est çhem. Onbaşi game dı gami este, vake wuy zerrê mı, uza desınde merd.



Çhor seri Pilvank te mendime, dıma ke dew bi serbeşt, 1950 de şime dewa ho. Şime ke ne boniye, ne hêgae. Tawa nêmendo, her çi vêsno. Payız vi... Sodır tiji estêne. Eke bi sonde siliye mezal ma nêdêne. Hata sodır ma sero vorêne. Bon çine vi, esket ki mara dür vi...

Eve o hal axre ma bon kerd taman, sarê ho kerd bin.



Çhor domonê mı bi, dı lazek dı ki çeneki. Domen ende pil vi. Şime ware.



Lazek ’ve çêneke ra, zu ki laze de apê mı, ware ra yene dewe. Rae ra bene têsani, hêniyê esket vanê, sone a hêni ser.



Lazê mı uza bomba vineno, bomba otuz-sekiz-(38) ra menda, nêzonene çıka. Pê kaykene, lazek seke dano kemere ro peqena, hiremena bi dırvetin, dıma ki merdi.



Lazeko bin ki şiving ro şi, merd. Peyde jü çêneke mende.



Usaro, ware derimi... Çê Pirê ma ki leê ma de ware de re. Lazê Pirê ma, vake, „payız sıma bon Khêmerê Bımbarek.“Ma niaz u qırvanê ho guret şime.



A sewe uza kotime ra, eke cêray me ra lazê Pirê ma pers kerd, vake, “kam hewn diyo.”Mı vake, Piro mı hewn nêdiyo. Hermeta mı vake, “mı diyo”



Laze Pir pers kerd, vake,

-senê hewno.

Hermeta mı vake

- Hewn de şüne Tulık. Tulık de jü cinike esta, cıra vane, Ana Mırcane... Eve ho Kuresıza, mıra pers kerd, vake, “to çıra thola”
Mı va

- ma ez sekeri, keş tawa mı nêda.

Mıra vake

--eke hêniyo, ala mıde bê.

Dıma şüne, guko de soe ard kerd vıra ra mı“



Dıma na lazê mıno ke nıka esto, o bi. A çeneke ki zevejiye. Bonê ho verê Dundıle de vi. Çena cıra vi ye, dı serene vi ye.


Payız vi, hona newe de koti vi ra, çêna de huya bine biye.



Sılıye vora, hard beno nerm, kemere cor de gırr bena yena, gınena boni sero, çena mı ve dı tornonune mı ra kı hen şı.



Çı pers kena, hal waxtê ma nia vi. Ma dewi kerd şen, bağ u baxçeyi nay ’ve ro.



Peniye de 1996 de dew oncia kerd thol.



1938 de çıqaşê ke yavaniye vi ye, mılet mert vi. Nıka mılet biyo xızan.



Demenu ve Alu ra, Demenu ve Wusvu ra, çığaş ke jümin re dısmenen kerdê vi, Otuz-sekiz (38) de pê nona dinê xeleşiay me. Tayine milişen kerdêne, ae binen ki ma xelesnenê.
Sayfa başına dön Aşağa gitmek
Kullanıcı profilini gör
 
Wuşênê Dewa Borê Bınêni Tertelê 38i sero Qeseykeno
Önceki başlık Sonraki başlık Sayfa başına dön 
1 sayfadaki 1 sayfası

Bu forumun müsaadesi var:Bu forumdaki mesajlara cevap veremezsiniz
FORUM :: DERSIM FORUMU-
Buraya geçin: